ეს გვერდი დაეთმობა ნინო დარბაისელის "მხიარულ რითმებს". მისი პატარ-პატარა ლექსები ერთობ საჭირბოროტო საკითხებს მხიარულად აშუქებენ, რაც განწყობის ამაღლებასა და ამა თუ იმ მოვლენის სხვა თვალით დანახვებაში გვეხმარება.
* * *
იმდენი ვიძახეთ,
იმდენი ვიმღერეთ:
“ჩვენ ერთი გუნდი ვართ!
ჩვენ ერთი გუნდი ვართ!”
გაგვისკდა საქმე და
ცალ-ცალკე გავრბივართ!
არც შინ და არც გარეთ
არავის ვუნდივართ.
(გამოხმაურება "სპლიყვის" აწდახურულ თემაზე, "იყიდება ბილიარდი")
-იყიდება ბილიარდი!
- ნეტა, რა ღირს?
- მილიარდი.
- რა მოჰყვება?
- კია
-გატეხილი კია.
- სამკუთხედში - “შარები”, დამატებით შარი...
- შარი ჩვენიც გვეყოფა, უკვე ყელში არი...
თანაც, სად დავატიო?
იოლია განა,
ბილიარდის გულისთვის ა ვ ა ნ გ რ ი ო ბ ა რ ი ?
* * *
თალიბანამდე - იმათგან, ვინც გადაიღო „ჯიხადი“,
თურმე ისეთი შორია, როგორც ვირისგან - ჯიხვამდი.
* * *
ინტერნეტში ყველა ფოტო განა ფოტოშოფურია.
მსმენელების ქცევა ჩვენში მართლაც, ავადმყოფურია,
ტაშს უკრავენ სამშობლოში და კილავენ, როცა გარეთ
მტრის დროშაში შეხვეული ბღავის ქეთათო ფურია.
ხალხურს მოტივებზედ
-შავი შაშვი, ჩიორა, ნეტავ რასა ჩიოდა?
- კაცს, თუ უზრდელია,
იმას რა ურჩიო, რა,
ურჩიო, რა,
ჩიორა,
ჩიორა,
ურჩიო რააააააააააა!
* * *
-პარლამენტის შენობაში იმნაირად დაცხა,
შიგ ჯდომა და მუშაობა არ გამოდის, რაცხა,
- ვინც კი უძლებს, რახანია, გიჟად შეირაცხა.
გონს მოუხმე, თავს მიხედე და მანდედან აცხა!
* * *
საიმედო ხელშია ფინანსების ამბავი,
ვიდრე საქმეს განაგებს მაჰა რაჯი - ხადური.
... მაგრამ ამ და სხვა ამბებს დღეს დაეძებს, აბა, ვინ?
- ინტერნეტში გაისმის მუქარა ჯიხადური.
* * *
ნანაცარი კვლავ ხელებს სხვის ჯიბეში აცეცებს,
ჭამს ქოცების სუფრიდან გადმოცვენილ ნამცეცებს.
პრევენცია
თუ იმოყვრეს პუტინი,
თუ იმტერეს ობაბა,
რამე ჭირი არ შეგვყაროს
უ ი ნ ტ ე რ ე ს ო ბ ა მ ა.
* * *
ვერ ძღებიან „ერისკაცნი“
ფულით - აქა, ფულით - იქა.
ჰოდა, ქართულ „პოლიტიკას“
უნდა ერქვას „ფულიტიკა“.
* * *
დღეს სუყველას სულში გვიდუღს
სოდომი თუ ლესბოსია.
ვჭორაობთ და გავიძახით:
- ის ბოზია, ეს ბოზია!
* * *
კარი ფართოდ სიცრუეს, ვთქვა, რის გამო ეღება?
- გვმოძღვრავს, ვისაც საერთოდ ხმა არ ამოეღება.
* * *
ჩანს, ნამეტანი აეწვა, წკმუტუნებს ისტე მურია:
“ვერ არკვევს”, დანაშაული კერძო თუ სისტემურია.
* * *
ქუთაისის მერს ვუსმინე, მერია და რა მერია!
რა უნდოდა, ვერ გავუგე, კვალი როგორ ამერია!
- ნუ იდარდებ, არც ჩვენ გვესმის - ამბობს იმერ-ამერია.
მერს რა უნდა?! აგერ - ფული, ალბათ, აგერ ჰამერია.
* * *
როგორა ვართ?! არ გვეშვება ძველი ჭირი - შეჩვევითი.
ისევ ნათელ-მირონობა, სამართალი - შერჩევითი.
წვალობ, ვეღარ გაგიგია, ამ ცხოვრებას შერჩე რითი.
“ვაი, 38-იო!” ( ფეისბუქური კომენტარებიდან)
ჟამი დგას სააღსასრულო,
და არა - სადასაბამე:
კაცები - კაცებს აბამენ,
ქალები - ქალებს აბამენ,
ვინ დამაჯერებს, აბა, მე,
ანდა ირწმუნებს, აბა, ვინ,
რომ ვინმეს ისევ ადარდებს
ქალის და კაცის ამბავი!
* * *
დედაია, რეებს ყვება აგი ჩვენი მოროშკინა!
ყველა ჭორი ჩაუბღუჯავს, სადაც რამე მოჟოშკილა.
* * *
დამნაშავე?! - არის კარგად.
როდი სცივა, როდი შია,
რაც არ უნდა ჩაიდინოს,
ფასი, თურმე - “ბოდიშია”!
პოლიტ- ენის გასატეხი
(
გაიმეორეთ
სამჯერ
ზედიზედ)
გასუსული, რასმუნსენო,
ამდენ სულელს რას უსმენო!
* * *
ბევრია ჩაყუდებული
და ბევრიც - ჩასაყუდელი.
ზოგი ყოფილი “კუდელი”
წკმუტუნებს, როგორც პუდელი.
* * *
- ყურადღება, ყურადღება,
იხურება ბარი “ბუდა”.
შიგ შეფრინდა თურმე ბუ და
მოითხოვა “მალიბუ” და
სამუდამოდ დაიბუდა.
და გააბა ქსელი ისე,
ვით ობობამ-აბლაბუდა.
- მერე ბარი?
- უმაგბაროდ გავძლებთ ბარემ “კაკ ნიბუდა”!
ნაცგოდება
იმდენი რამე დაგვბრალდა, იმდენი რამე გვეწოდა...
როდესაც მიდის ზეწოლა, რა დაგრჩენია? - ქვეწოლა!
* * *
ღრუსეთის მოქალაქეა ეს დეპარდიე ჟერარა,
სოხუმს ეწვია, პუტინის სიტყვები დაიჯერა რა.
პოლიტიკისა "არ ესმის": არის ვინ - ვინ, "დაჟე", რა - რა...
ჩვენი ქართული გინება უკვე ესმის თუ ჯერ არა?
* * *
ტი-ტუუ! რას კივის ეკრანზე ბერას დაქალი - სუბლატი!
როდემდე უნდა მეფობდეს შოუ ბიზნესში სულ ბლატი?
tataze
ReplyDelete