პრაქტიკული მათემატიკა (მე-2 ნაწ.)

ვასრულებთ წინა ნომერში გამოქვეყნებული ახალგაზრდა, ნიჭიერი, მაგრამ უცნობი ავტორის ნაწარმოებს. მოთხრობა დაიწერა 2003 წელს და 2012 წლამდე მხოლოდ ერთ ეგზემპლარად და ორ ასლად იყო მთელ მსოფლიოში გავრცელებული. ერთი ასლი ბოროტ ადამიანს ჩაუვარდა ხელთ, მეორე – ჩვენ, ხოლო დედანი – ავტორს. იმედია, აქ აღწერილი ამბავი ცოტათი მაინც შეგაყვარებთ საგან მათემატიკას.

(პირველი ნაწილი იხ. აქ)

 

 

„სასამართლოს დადგენილებით შენი ქარხანა დაიხურება, ანგარიშები გაიყინება, შენ კი აღარ გაბედო ამ ეშმაკის მანქანების გაკეთება, თორემ სამუდამოს მოგისჯი და სულს ამოგაცლიო!“ - დამიბარა წასვლის წინ და კარები ისე გაიჯახუნა, ფანჯრებმა ზრიალი დაიწყეს...

-უხ, მაგისი!... - ვეღარ მოვთოკე ნერვები, - რას გერჩოდნენ, ან ხელსაწყოები რატომ წაგართვეს, იმ ნაძირლებმა?

-დამაცა, დავამთავრო. რომ დავლაგდი, მეც გული მომივიდა და სასამართლოში გასაჩივრება გადავწყვიტე. იმდღესვე წავედი კიდეც ქალაქში, მაგრამ რაც იქ ვნახე... უკან გამოვიპარე.

-რა ნახე ამისთანა?

-ელექტროშოკებით შეიარაღებული პოლიციელები ჩემს გვირგვინებს ძალით თუ ნებით აგროვებდნენ და ნაგვის მაქანაში ყრიდნენ. ერთი გნიასი იდგა, ვიტრინები და მანქანის მინები ჩამსხვრეული იყო, ნამდვილი ომი გეგონებოდა. სახლიდან ცხვირი აღარ გამომიყვია, ინტერნეტიდან ვადევნებდი თვალს მოვლენებს. ყველა ტელევიზია და გაზეთი მე მთათხავდა. მე მგონი, ლოგიკურიც იყო. ადამიანები ისე შიფრავდნენ ერთმანეთს, თითქოს გადამწვარ ნათურას ამოწმებენ სინათლეზეო. ორი კაცი შეხვდებოდა ქუჩაში ერთმანეთს, ორივე თავ-თავისთვის მიმავალი, უცებ ატეხავდნენ ჩხუბს და ჩაითრევდნენ სხვებსაც. ვითომ უმიზეზოდ, მაგრამ, ალბათ, ერთმანეთის აზრებს რადგან კითხულობდნენ, მაგიტომ. ეგ კი არა, მეც ლამის ვცემე რამდენიმე ჩემზე ცუდად გაფიქრების გამო. ისე გახშირებულა ასეთი ჩხუბები, რომ პირდაპირ ეთერშიც კი იღებდნენ. ამასთან, უმუშევრობამაც მოიმატა, რადგან ყველა უფროსს „მათემათიკოს გვირგვინი“ ეხურა თავზე.

უკანასკნელი იმპერატორი (მე-6 სერია)

Sh@ko-ს იმპერატორად კურთხევას მშვიდ გარემოში არ ჩაუვლია. ბოლოსწინა იმპერატორი, Balu, ძალაუფლებას არ ელეოდა და გვირგვინის შენარჩუნებისთვის ყველა ღონეს ხმარობდა. მაგრამ მის ხელისუფლებას წყალი ჰქონდა შეყენებული უკვე - ვენესუელაში დიდი სახალხო აჯანყება მზადდებოდა Balu-ს დასამხობად და Sh@ko-ს ხელისუფლებაში მოსაყვანად. Balu-მ იგრძნო მისი მმართველობის დასასრულის მოახლოება, გვირგვინი ბოხჩაში გამოკრა და ვენესუელიდან გადაიხვეწა.

Sh@ko-ს ტახტი უბრძოლველად დარჩა, მაგრამ უგვირგვინო იმპერატორს ხალხი არ სცნობდა, ამიტომ გვირგვინის მოსაპოვებლად კეთილ ფერია Ina-una-ს მიმართა. Ina-una Balu-სთან დაახლოებული პირი იყო და ძალიან განიცდიდა მის ბედს. მან გადახვეწილი იმპერატორის მოსაძებნად მაგიური ძალა გამოიყენა და ადვილადაც მიაგნო. ფერიამ დაარწმუნა Balu, რომ თუ გვირგვინს ყველაზე მაღალი ხის ძირში არ დამარხავდა სავსემთვარობამდე, იგი საშინელ მაქციად გადაიქცეოდა, ხოლო გამთენიისას დაიფერფლებოდა.

Balu-მ დაუჯერა და ისე მოიქცა, როგორც ფერიამ უთხრა. Ina-una-მ გვირგვინი მისგან უჩუმრად ამოთხარა და Sh@ko-ს მიუტანა. ახალმა იმპერატორმა გვირგვინი მოირგო და ვენესუელის მართვას შეუდგა, ხოლო ფერია გაწეული სამსახურისთვის ჯადოსნური ყუთით და ვენესუელის დამსახურებული ვიჯეის წოდებით დააჯილდოვა. ყუთში ყველა მომღერლის ვიდეო კლიპი იყო და Ina-una მონაცვლეობით უკრავდა და ვენესუელის მოსახლეობას მხიარულ ხასიათზე აყენებდა.

ცხადია, როდესაც Sh@ko გვირგვინს ეძებდა, ვენესუელას დროებითი მმართველი უნდა ჰყოლოდა. ამ საპასუხისმგებლო საქმეს ასრულებდა მოკლეთილბოროტო Bizzy. მის ხასიათში სისასტიკე და იუმორი ისე ჰარმონიულად იყო შერწყმული, რომ მას სხვანაირს ვერც წარმოიდგენდით. მაგალითად, შეეძლო შუაღამე სახლში შესულიყო და ცოლისთვის დაეძახა: „ჰეი, ბავშვები გააცხელე, საჭმელი გააღვიძე!“ და მის მომღიმარ სახეზე სულაც არ გაელვებულიყო ის კადრები, რომლებიც ცოტა ხნის წინ იაპონურ კოლეჯში დაატრიალა - უდანაშაულო, მაგრამ ბოროტი გოგოების სამურაის ხმლით უმოწყალო ჩეხვა.

ინაუგურაციის დღესაც დიდი სტიქიური უბედურებები დაატყდა თავს ვენესუელას. როცა Sh@ko-ს გაბურძგნულ თავს გვირგვინი შეეხო, მზე დაბნელდა, ხოლო როცა კვერთხი შემართა - ჭექა-ქუხილი ატყდა. იმპერატორად კურთხევის ბოლო ეტაპი კვერთხის მიწაზე დაბაკუნება იყო, რის შემდეგაც საშინელი მიწისძვრა მოხდა. ეპიცენტრი მელომანიის ოლქი იყო. აქ ცხოვრობნენ ცნობილი მომღერლები, რომელთა უმრავლესობას სახლები დაენგრათ. სახლები დაინგრა ვენესუელის სხვა ოლქებშიც...

 

თავზარდაცემული მოსახლეობა გოდებდა და დანაკარგებს მტკივნეულად განიცდიდა. შესაძლოა, სწორედ ეს გახდა ვენესუელაში თვითმკვლელობების მოხშირების მიზეზი.

არასიმეტრიული კროსვორდი

ჟურნალს, ისევე როგორც სხვა ჟურნალებს, სჭირდებოდა რამე გასართობი გვერდი. გართობის ერთ-ერთი სახეა კროსვორდი, რომლის შევსებაც ბევრს უყვარს. მაგრამ ეს არის არასიმეტრიული და არამოტივირებული (ხმამაღალი ნათქვამია და) კროსვორდი. თუ კროსვორს ვერ ამოხსნი, გამოგყვება საშემოდგომო! კროსვორდის ამოსახსნელად უნდა ერკვეოდე ქართულ ინტერნეტ სივრცეში მიმდინარე ღადაობებში. მინიმუმ, ფორუმ.გეს უსათაუროს აქტიური წევრი უნდა ყოფილიყავი მაინც. ყველა კითხვა იუმორისტულია და ქვეტექსტებს არ ატარებს. თუ რამე პრობლემაა იცით სადაც ვართ მაგრად

(ბოლო წინადადება სასვენ ნიშნებს არ საჭიროებს)



ამ გვერდზე, შეგიძლია, უბრალოდ გადაიკითხო კითხვები, თუმცა, თუ ამობეჭდვა გეზარება, მაგრამ შევსებაც გინდათ, შეგიძლიათ გადახვიდეთ ბმულზე და კითხვების ქვემოთ არის ღილაკი Solve online. მასზე დაკლიკებით ასოების ჩაწერას შეძლებ. კარგ გართობას გისურვებთ! პუ.სუ. ონლაინ კროსვორდი მხოლოდ 59 კითხვისგან შედგება.

ხელმარჯვე ოსტატი

  ჟურნალის ეს ნომერი ანაგლიფურ სურათებს შეიცავს, თქვენ კი მისი დანახვა შეუიარაღებელი თვალით არ შეგიძლიათ. მე, ჟურნალის ახალმა ძველმა პერსონაჟმა, ვიზრუნე თქვენზე და გთავაზობთ ანაგლიფური სათვალის კუსტარულ პირობებში დამზადების ხერხს.

  ამობეჭდეთ სურათი ან თავად დახატეთ მსგავსი. გამოჭერით ნაწილები, წყვეტილ ხაზებზე ჩაჭერით და ერთმანეთს ჩამოაცვით. წითელი და ცისფერი ლინზების ნაცვლად შეგიძლიათ იგივე ფერის გამჭვირვალე მასალა მოიძიოთ და მიაკრათ. მაგალითად, რვეულების ფერადი გადასაკრავი, ფერადი გამჭვირ-ვალე საქაღალდე, ბოლოს და ბოლოს შესაბამისი ფერის პლასტმასის ბოთლიც კი.

  ხელებს ყველაფერი შეუძლიათ, ფანტაზია კი ამოუწურავია. შემდეგ ნომრებშიც სხვა ბევრ გასართობს შემოგთავაზებთ, დამელოდეთ და შეგიძლიათ თქვენი იდეებიც გამიზიაროთ.

რედაქტორის ხე (არყის ხე)

თითქმის შეუსრულებელი ნისია

ჟურნალის გამოსვლის დრო კი არ მოდის, მიდის... მთელი ვარდობისთვე ჩაგვივარდა, ხან საქეიფოდ ვიყავით, ხან – უქეიფოდ, ხან – ძალიან დაკავებული, ხან – ზარმაცობის ზენიტში და მიილია მაისიც. ისე, ბილ გეიტსმა თქვა, ვცდილობ სამსახურში ზარმაცები ავიყვანო, რადგან საქმეების მარტივად მოგვარებას ცდილობენო. ცხადია, მეც შემიძლია იგივე გავაკეთო, მაგრამ თავად ვარ ზარმაცი და თავად ვცდილობ, მარტივი გამოსავალი ვნახო, რომ ჟურნალი როგორმე ვაცოცხლო.

ამბობენ, სიმართლეს ლამაზი თვალები აქვსო, ჰოდა, ჩვენც ჩავხედოთ და ვთქვათ, რომ ეს თვე ძალიან დაკავებული ვიყავი. მოგეხსენებათ, ამ ჟურნალზე არ ვმუშაობთ ჟურნალისტები. შესაბამისად, ჩვენ–ჩვენი საქმიანობაა პირველ რიგში მისახედი და ჟურნალისთვის დრო ცოტა, ან არ გვრჩება. საქმის გამოსასწორებლად ნამდვილი ჟურნალისტიც მივიღეთ კოლეგიაში და ექიმიც (ყოველი შემთხვევისთვის), მაგრამ საწყალ კაცს ქვა აღმართშიც მიეწევაო – ნამდვილი ჟურნალისტის მიერ დაწერილი სტატია დამეკარგა იძულებული გავხდი წაკითხულის შინაარსი დამეწერა.

1 ივნისისთვის, ბავშვთა დაცვის დღესთან დაკავშირებით, ჩვენმა ჟურნალმა კონკურსი გამოაცხადა ბავშვთა ნახატებზე. რედაქციაში უამრავი ნახატი მოვიდა, რომელიც შოკოლადში გადავუცვალეთ ავტორებს და მკითხველს საშუალება მივეცით ექვს(6)კლუზიურად გაცნობოდნენ მათ და თავადაც მიეღოთ შოკო-კონკურსში მონაწილეობა.

სად დაიხატა ტიმატიმ ხინკალ-ჩალაღაჯ ტატუ

და რა გადახდა თავს 1995 თუ 96 წლებში ყაზახეთში?

საქართველო ოდითგან იყო სტუმართმოყვარეობით განთქმული ქვეყანა, მაგრამ ამ ბოლო დროს სტუმრებმა, უცხოური შოუ–ბიზნესის წარმომადგენლებმა, ჩვენთან სიარულს მოუხშირეს, რაც ჩვენი ქვეყნის კულტურულ ცხოვრებაზე დადებითად ისახება. ჩვენმა ჟურნალმა შოუ–ბიზნესის წარმომადგენლების სტუმრობის სტატისტიკა შეადგინა და აღმოჩნდა, რომ ყველაზე მეტჯერ მზიურ საქართველოს ტიმატი სტუმრობდა, რომელიც ამა წლის მაისში მეხუთეჯერ გვეწვია და რომელიც მისი ტატუებითაა ცნობილი – ჩემი სკოლის დროინდელი რვეულივითა აქვს გადაჯღაბნილი ყველაფერი (ალბათ, ყველაფერი). რომ გავიგე, ჩამოდიოდა, მე, „მართლა შოკოლადის“ მართლა ჟურნალისტმა, მარუსამ, თმა წითლად გადავიღებე და ტიმატის მიერ გამართულ პრესკონფერენციაზე გავეშურე, რათა ჩვენი მკითხველისთვის ინფორმაცია ობიექტურად მიმეწოდებინა მისი ტატუების შესახებ.

ჩვენთვის ცნობილი გახდა, გახდა რა,  ტიმატიმ თავისივე საინფორმაციო ღრუთი აღიარა, რომ მის სხეულზე ყოველი ტატუ მისთვის საყვარელ ან მნიშვნელოვან რამეს აღნიშნავდა. მან ასევე სიყვარული აუხსნა ქართულ სამზარეულოსაც, ამიტომ ეჭვი გვქონდა, რომ სადმე ხინკლის ან ჩალაღაჯის ტატუს დაიხატებდა და ჩვენი მისიაც სწორედ ამ ტატუს ფირზე აღბეჭდვა იყო. თუმცა, იმედი გაგვიცრუვდა – მზისა და ვარდების მხარეს საკმაოდ ჩაფუთნული სწვეოდა „შავი ვარსკვლავი“ და კისრის მალებისა და თითების ტატუს მეტი არაფერი უჩანდა.