ჟურნალის ყდა — მაგიური და მიმზიდველი. თუ ოდესმე ჟურნალის ყდაზე მოხვდებით, იგრძნობთ, რომ ეს უბრალო ფოტო არ არის. ამით თითქოს მთელი ჟურნალი თქვენ გეძღვნებათ, მთელი ქვეყანა ნახავს თქვენს სურათს, ყველა შეგიყვარებთ და აქედან პოპულარულობამდეც ერთი ნაბიჯია. პოპულარულობა კი ის არის, რაც უმეტეს ჩვენგანს ასე ძალიან გვინდა და მისი გულისთვის უამრავ ოინბაზობას ჩავდივართ.
ჟურნალის ყდა მარტო თქვენთვის არ არის მნიშვნელოვანი, ის ჩვენი, ჟურნალების, სავიზიტო ბარათია. ლამაზად გაფორმებული ყდა ჟურნალის წარმატებას ნახევარია და სულაც არ აქვს მნიშვნელობა, სტატიები საინტერესო იქნება თუ არა. მაგალითისთვის „მართლა შოკოლადის“ პირველ ნომერს მოვიყვან, რომლის ყდაზეც თეთრკაბიანი აღშფოთებული გოგო ეხატა. დაკვირვებული მკითხველი მის შესახებ მხოლოდ იმას გაიგებდა, რომ შოკოლადებით დატვირთული ყვითელი იახტა აჩუქეს და ასე მოიგეს მისი გული, ხოლო შოკოლადებს ისევე შეჭამდა, როგორც თქვენ ანალოგიურ სიტუაციაში. მიუხედავად ამ იდუმალებისა, ჟურნალის პირველმა ნომერმა დიდი გამოხმაურება ჰპოვა. საქართველოს ყველა რეგიონიდან, განსაკუთრებით ბათუმიდან, გვირეკავდნენ და გვიგზავნიდნენ შოკოლადებს ამ არაჩვეულებრივი გოგონასთვის გადასაცემად. რადგან მისი კოორდინატები დაუდგენელია, შოკოლადები ჩვენს რედაქციაში ინახება და პატრონს ელის.
რადგან ამ ქვეყნად მარადიული არაფერია, დროთა განმავლობაში ნებისმიერ პოპულარულ ჟურნალს სჭირდება რებრენდინგი. ამიტომ, ჩვენც არ დავახანეთ და რომელიმე ცნობილი ჟურნალის მიბაძვა ვცადეთ. ბევრი ჟურნალის ყდა მოვათვალიერეთ და გამოთქმა რომ არის, „ისეთი კარგია, თვალში რომ ჩაგივარდეს, ხელს არ ამოისვამო“, ზუსტად ეგრე ჩაგვივარდა თვალში ორი ჟურნალი, ერთი მარჯვენაში და მეორე, შესაბამისად - მარცხენაში. სარედაქციო საბჭო თითქმის ერთხმად უჭერდა მხარს ყდაზე მომღიმარი ადამიანის დაბეჭდვას, მაგრამ ერთმა ჩვენთაგანმა დამაჯერებლად დაგვისაბუთა, რომ პირველ ჟურნალზე გამოსახული კაცის ღიმილი პოზიტივთან სულაც არ ასოცირდებოდა, რადგან ის, ბინძური რუსული ფულით გამილიარდერებული, სხვა არამილიარდერებს დასცინოდა.
ასე, რომ სარედაქციო საბჭომ თითქმის ერთხმად გადავწყვიტეთ ჟურნალის ყდაზე სამშობლოზე დარდით დაღლილი ადამიანი დაგვებეჭდა. თითქმის ერთხმად იმიტომ, რომ ამ იდეის მოწინააღმდეგე პირველი იდეის მოწინააღმდეგე იყო, რომელმაც გაგვაფრთხილა - დაგვიჭერენო და თავად თავი შეიკავა გადაწყვეტილების მიღებისგან.
დღის წესრიგის მეორე საკითხი იყო - ვინ დაგვებეჭდა. ისევ იმ ორი ფავორიტის პრაქტიკას გადავხედეთ. პირველმა თავის ყდაზე პირველი ქართველი მილიარდერი დაბეჭდა, მეორემ - პირველი ქართველი აღმშენებელი. ჩვენც გადავწყვიტეთ ვინმე პირველი დაგვებეჭდა და ფოტოზე ქასთინგი გამოვაცხადეთ. რედაქციაში უამრავი მსურველის ფოტო შემოვიდა: პირველი წითურთმიანი, პირველი კლავიატურის კაი ბიჭი, პირველი შავი იუმორისტი, პირველი შაურმის გურმანი, პირველ მერხზე მჯდომი, პირველი მორცხვი, რომელსაც ფოტოს გამოგზავნისაც კი შერცხვა...
დიდი ბჭობის შემდეგ არჩევანი ჩვენს პირველ მკითხველზე შევაჩერეთ, რომელიც, ამავდროულად, პირველი მძიმეწონიანი მკითხველიც არის. მისმა ფოტომ დააკმაყოფილა გამოცხადებული კონკურსის პირობები და გადაღების დროს ფიქრობდა, „ეს მინდა“-ო. რას იფიქრებდა ფოტოგრაფი, თუ მართლა უნდოდა და ფოტოსესიის დამთავრებისთანავე შეჭამდა შოკოლადის დეკორაციებს?!
და აი, ბოლოსდაბოლოს, მივაღწიეთ მესამე საკითხამდე - როგორ გავამრავლოთ ჟურნალის მკითხველი. მოგეხსენებათ, ჟურნალის პოპულარულობას მრავალრიცხოვანი მკითხველი განსაზღვრავს, მაგრამ მათი გამრავლების ტაბულა არ არსებობს, შეიძლება გყავდეს მკითხველები, შეიძლება - არა. მიმბაძველობის დიდი მინუსი ისაა, რომ საქმეში წარუმატებლობის შემთხვევაში თვალებს იმისკენ მიაპყრობ, ვისაც ბაძავ. ამიტომ ჩვენც ჩვენი მისაბაძი ჟურნალის გავრცელების ისტორიას გადავხედეთ. ეს ჟურნალი რომ არ იყიდებოდა, ერთ-ერთი საკაბელო ტელევიზიის აბონენტებს ხვდებოდათ დილაობით კარის ზღურბლთან სრულიად უსასყიდლოდ. ისტორიას თუ უფრო ღრმად გავქექავთ, აღმოვაჩენთ, რომ ჟურნალს, რომელსაც ჩვენ ვბაძავთ, თავის დროზე თვითონ მიუბაძავს არამარტო იმ პირველი ჟურნალისთვის, რომელმაც ყდაზე არამილიარდერებზე მომღიმარი კაცი დაბეჭდა, არამედ ჩვენი „მართლა შოკოლადისთვისაც“, რომელიც იანვარში თვითონ არიგებდა თავის თავს უფასოდ.
ჰაჰ! ქურდის ქურდები გამოვედით... ეს ფაქტი კიდევ ერთხელ ადასტურებს, რომ მიმბაძველობა და სხვის მსგავსად პოპულარულობის მოპოვება ძალიან დაბალი დონეა. პლაგიატიზმი ადამიანის უნიკალურობას სპობს და სკოლაში საკონტროლოს გადაწერისას ჭკვიან მოსწავლეზე დამოკიდებულივით გხდის. დამოკიდებული მანამ, სანამ თავის რვეულს მასწავლებელს არ ჩააბარებს და ამასთან, დაშვებული გექნება ყველა ის შეცდომა, რაც მან დაუშვა.
ამიტომ, იყავით დამოუკიდებლები, ორიგინალურები, გამორჩეულები და ნებისმიერი ჟურნალის ყდაზე მოხვდებით. მე მჯერა, რომ თქვენ მართლაც გამორჩეულები ხართ. თუ სურვილი გაქვთ, შემოუერთდით ჟურნალ „მართლა შოკოლადს“, ითანამშრომლეთ ან უბრალოდ, იკითხეთ და გაერთეთ ჩვენთან ერთად მისამართზე: www.martlashoko.blospot.com.
No comments:
Post a Comment